«Қоштасатын уақыт келді»: Месси Аргентина құрамасындағы мансабын аяқтады
Лионель Месси Аргентина ұлттық құрамасындағы мансабын аяқтағанын мәлімдеді деп хабарлайды aishyq.kz.
Есімі аңызға айналған футболшының айтуынша, ол 2026 жылғы әлем чемпионатының финалындағы жеңілістен кейін-ақ құрамамен қоштасқысы келген. Алайда әкесінің қайтыс болуына байланысты бұл шешімін кейінге қалдырған.
Мессидің ұлттық құрамадағы жолы бірден жеңіспен басталған жоқ. 2016 жылға дейін ол Аргентина сапында тек Олимпиада ойындарының (Бейжің-2008) алтынын жеңіп, әлем чемпионаты (Бразилия-2014) мен Америка кубогында бірнеше рет күміс жүлдеге ие болды. 2016 жылы Чилиге қарсы Америка кубогының финалында Аргентина пенальти сериясында жеңіліп, Месси өз соққысын мүлт жіберді. Осыдан кейін ол ұлттық құрамадан кететінін жариялаған еді. Алайда елде жанкүйерлердің үлкен науқаны басталып, Мессиден қайта оралуын сұрады. Нәтижесінде футболшы бір айдан кейін құрамаға қайта оралған болатын.
Месси Аргентина сапында 207 матч өткізіп, 125 гол соққан және 68 нәтижелі пас берді. Матч саны бойынша ол Оңтүстік Америка рекордын жаңартып, нәтижелі пастарының саны әлемдік рекорд болып саналады. Ұлттық құрамадағы 22 жылдық мансабында Месси бес ірі трофей жеңіп алды. Оның ішінде 2022 жылғы әлем чемпионаты, 2021 және 2024 жылдардағы Америка кубогы, 2022 жылғы Финалиссима және 2008 жылғы Олимпиада ойындарының алтыны бар.
Месси әлем чемпионы атанғанда 35 жаста болды. Оның негізгі халықаралық жетістіктерінің басым бөлігі де 34 жастан кейін келген. 2026 жылғы әлем чемпионатында Аргентина финалда жеңіліп қалғанымен, Месси турнирде 8 гол соғып, 4 нәтижелі пас берді.
Осылайша Мессидің Аргентина құрамасымен қоштасуы — футболдағы тұтас бір дәуірдің аяқталғанын білдіреді. Ол қоштасу сөзінде Аргентинаға деген махаббатын білдіріп әлеуметтік желіде «Мені аргентиналық еткені үшін Құдайға рақмет… Алға, Аргентина!» деп жазба жариялады.
