Суданда БҰҰ гуманитарлық көмегі тиелген жүк көлігіне дронмен шабуыл жасалды

Суданның Солтүстік Дарфур провинциясында БҰҰ Босқындар ісі жөніндегі жоғарғы комиссары басқармасы гуманитарлық көмегі тиелген жүк көлігі дрон шабуылынан жойылды. Бұл туралы ұйым X әлеуметтік желісінде хабарлады.

Мәліметке сәйкес, жүк көлігі шұғыл баспанаға арналған жиынтықтарды Тавила елді мекеніне жеткізіп бара жатқан. Бұл өңірге қауіпсіздік мақсатында жүз мыңдаған адам қоныс аударған.

Шабуыл салдарынан 1300-ден астам отбасы аса қажетті баспанасыз қалды. Жүк көлігінің жүргізушісі аман қалғаны хабарланды.

Ұйым мұндай шабуылдардың жол берілмейтінін атап өтті. Себебі олар бейбіт тұрғындар мен гуманитарлық қызметкерлердің өміріне қауіп төндіріп, өңірдегі дағдарысты одан әрі ушықтырады.